Талаба ёшларни ўқиш давридаёқ тест синовлари ва суҳбат асосида ишга жалб этиб, амалий кўникмаларини мустаҳкамлаш тажрибасини биринчилардан бўлиб йўлга қўйган Туронбанк, энди махсус стипендия жорий этди. Унга кўра, иқтисодиёт йўналишидаги ОТМларга энг юқори балл билан ўқишга қабул қилинган 100 нафар иқтидорли ёшлар номзод сифатида танлаб олинди. Мазкур лойиҳанинг аҳамиятли жиҳати шундаки, стипендиядан ташқари банк томонидан талабаларнинг тўлов-контракт пуллари ҳам тўлаб берилиши кўзда тутилган.
Шу билан бирга “Туронбанк стипендияси” соҳиблари ўқиш даврининг 3-босқичидан бошлаб бевосита банкнинг ўзида малака ошириб, меҳнат фаолиятларини ҳам бошлашлари мумкин бўлади. Бу эса уларга назарий билимларни амалиёт билан мустаҳкамлаш, қўшимча даромадга эга бўлиш ва энг муҳими ўзлари учун аниқ иш жойини таъминлаш имкониятини яратади.
Куни кеча ТДИУ талабалари билан ўтган очиқ мулоқотда банк бошқаруви томонидан мазкур стипендия эгаларига махсус сертификатлар топширилди. Шунингдек, Туронбанк ва университет ўртасида ўзаро англашув ва ҳамкорлик меморандуми имзоланди. Бу орқали келгусида ёш кадрлар захирасини таъминлаш ва уларни ҳам моддий, ҳам маънавий қўллаб-қувватлашга эришиш мумкин бўлади. Асосийси эса улар олий таълимни якунлагач муносиб тажриба ва аниқ иш ўрнига эга бўлишларидир.
